Programet Bilaterale

Çfarë është

Programet dypalëshe financojnë projekte të përbashkëta kërkimore ndërmjet grupeve kërkimore shqiptare dhe atyre të vendeve partnere, në zbatim të marrëveshjeve ndërqeveritare për bashkëpunim shkencor dhe teknologjik.

Ato administrohen nga Agjencia Kombëtare e Kërkimit Shkencor dhe Inovacionit nëpërmjet Drejtorisë së Programeve Ndërkombëtare, Sektori i Marrëdhënieve Dypalëshe, gjithmonë në bashkëpunim me agjencinë homologe të vendit partner.

Partnerët strategjikë aktualë janë Kosova, Austria, Italia dhe Turqia.

Objektivat

Qëllimi parësor i këtyre programeve, të konceptuara si financim fillestar, është ndërtimi i urave të bashkëpunimit ndërinstitucional. Projektet mobilizojnë partneritetet mes institucioneve shqiptare të arsimit të lartë dhe atyre të huaja, duke u ofruar kërkuesve përvojën e nevojshme për të formuar konsorciume të suksesshme dhe për të përfituar më pas nga fondet me impakt më të madh të Bashkimit Europian — si Horizon Europe, programet e asistencës si IPA, dhe programet e rrjetëzimit si COST e CEEPUS.

Konkretisht, thirrjet dypalëshe synojnë:

• nxitjen e bashkëpunimit shkencor dhe teknologjik përmes mobilitetit të kërkuesve;
• shkëmbimin e njohurive midis grupeve kërkimore të dy vendeve;
• ndërtimin e partneriteteve institucionale të qëndrueshme dhe ndërkombëtarizimin e kërkimit shqiptar.

Fushat prioritare të thirrjeve përcaktohen në udhëzuesit e përbashkët me palën homologe, sipas Strategjisë së Specializimit Inteligjent (S3): Teknologjitë e Informacionit, Shëndetësia, Bujqësia dhe Mjedisi.

Kush mund të aplikojë

Sipas Thirrjes Shqipëri–Turqi 2026-2028, të drejtën për të propozuar projekte e ka çdo kërkues shkencor me gradën “Doktor”, i punësuar në një institucion publik ose privat që ka të përcaktuar në statutin e tij kërkimin shkencor.

Kufizime që zbatohen:

• Drejtuesi i projektit mund të paraqesë vetëm një aplikim për thirrje; në rast dorëzimi të disa aplikimeve merret në konsideratë i pari i regjistruar pranë AKKSHI.
• Ri-aplikimi në thirrje të reja lejohet vetëm nëse granti i mëparshëm është përmbyllur me sukses dhe raportet përfundimtare janë dorëzuar në kohën e mënyrën e duhur.
• Skualifikohen projekt-propozimet ku drejtuesi ose një anëtar i projektit është titullar i institucionit aplikues ose pjesë e Komisioneve të Ekspertëve Vlerësues të AKKSHI.

Çfarë financon

Financimi mbulon:

• Mobilitetin e kërkuesve — udhëtime, dieta ditore, akomodim dhe transport brenda e jashtë vendit.
• Publikimet — tarifat për botimin e artikujve shkencorë, botimet shkencore, pagesat për ISBN/ISSN, dokumentet e përgatitura për konferencat e parashikuara në projekt, posterat prezantues dhe përkthimet shkencore.
• Shpenzimet administrative — kite, reagentë dhe të ngjashme.

Zëra të tjerë, si pajisjet, mund të mbulohen nga palë të treta, me kusht që çdo mbështetje e tillë të deklarohet qartë në dokumentacion. Çdo shpenzim realizohet në përputhje me legjislacionin në fuqi për buxhetin e shtetit.

Sipas Thirrjes Shqipëri–Turqi 2026-2028, kohëzgjatja e projekteve është dy vjet dhe financimi shkon deri në 10.000 euro në vit, ose maksimumi 20.000 euro gjithsej për projekt. Kushtet financiare përcaktohen për çdo thirrje, në dakordësi me palën homologe.

Si të aplikoni

Çdo thirrje shpallet bashkërisht nga dy agjencitë përgjegjëse, mbi bazën e një Udhëzuesi të Përbashkët të dakordësuar paraprakisht. Dokumentacioni dorëzohet njëkohësisht pranë të dyja agjencive, secila sipas kërkesave të veta.

Paketa e aplikimit për palën shqiptare, sipas Thirrjes Shqipëri–Turqi 2026-2028, përmban:

• Formularin e Projekt-Propozimit në shqip (Shtojca 1) dhe në anglisht (Shtojca 1A), nga 2 kopje;
• Planin e Financimit (Shtojca 2) dhe Kalendarin e Aktiviteteve (Shtojca 3), nga 2 kopje;
• Deklaratën e Angazhimit (Shtojca 9), 1 kopje;
• Jetëshkrimet në anglisht të të dy drejtuesve të projektit, nga 2 kopje;
• Shkresën përcjellëse të firmosur e vulosur nga titullari i institucionit aplikues;
• Një kopje elektronike (CD/USB) me të gjithë dokumentacionin.

Dosja fizike dorëzohet me postë ose dorazi në Zyrën e Protokollit të AKKSHI, në zarf të mbyllur me shënimin e thirrjes përkatëse.

Projekt-propozimet vlerësohen sipas sistemeve të miratuara në secilin shtet. Lista e propozimeve të rekomanduara miratohet nga Komiteti i Përbashkët i dy vendeve. Miratimi përfundimtar për palën shqiptare kryhet nga Bordi i Administrimit të AKKSHI, dhe nënshkrimi i kontratës shënon fillimin zyrtar të zbatimit.

Thirrjet, dokumentet shoqëruese dhe afatet publikohen vetëm në www.nasri.gov.al.