EUREKA

Çfarë është

EUREKA është rrjeti ndërqeveritar më i madh në botë i shteteve që mbështesin kërkimin shkencor, zhvillimin dhe inovacionin. I themeluar në vitin 1985 nga 18 vende dhe Komisioni Europian, ky rrjet ministrish dhe agjencish nga 47 vende pjesëmarrëse u ofron kompanive, universiteteve dhe instituteve kërkimore mbështetje financiare, ekspertizë dhe hapësira për rritjen e biznesit.

Qëllimi i rrjetit është rritja e produktivitetit dhe e konkurrueshmërisë së industrive nëpërmjet financimit dhe mbështetjes së projekteve ndërkombëtare të kërkimit e zhvillimit, të nxitura nga nevojat reale të tregut. Fokusi është nxitja e ekselencës në inovacion, zhvillimi ekonomik, krijimi i vendeve të punës dhe konkurrueshmëria.

Rrjeti operon nëpërmjet disa programesh:

• Network Projects — thirrje për projekte bashkëpunuese K&ZH ndërmjet organizatave nga vendet pjesëmarrëse.
• Clusters — komunitete industrie, të ndërtuara rreth agjendave strategjike të kërkimit dhe inovacionit të zhvilluara në mënyrë të pavarur nga vetë Clusterat.
• Eurostars — programi ndërkombëtar i financimit për projekte bashkëpunuese K&ZH të udhëhequra nga ndërmarrje të vogla dhe të mesme inovative.
• Globalstars — projekte ndërmjet kompanive në vendet e rrjetit Eureka dhe tregje kryesore e në zhvillim jashtë tij.

Shqipëria është anëtare e EUREKA-s që nga viti 2021 dhe merr pjesë në programet Network Projects dhe Investment Readiness. Agjencia Kombëtare e Kërkimit Shkencor dhe Inovacionit është autoriteti kombëtar financues dhe mbështetës.

Kush mund të aplikojë

Biznese — të vogla, të mesme dhe të mëdha — universitete dhe institucione kërkimore në Republikën e Shqipërisë, si pjesë e një konsorciumi ndërkombëtar.

Konsorciumi duhet të përfshijë partnerë nga të paktën dy vende pjesëmarrëse në thirrje, nga të cilët të paktën një nga vendet e Ballkanit Perëndimor. Sipas kushteve të Eureka-s për projektet bashkëpunuese, konsorciumi duhet të përmbajë minimalisht dy institucione pjesëmarrëse, me fokus në përfshirjen e bizneseve. Përveç tyre mund të marrin pjesë partnerë nga vende të tjera të rrjetit ose jashtë tij, me kusht që financimi publik ose vetëfinancimi i tyre të sigurohet brenda afatit të thirrjes.

Çfarë financon

Çdo autoritet kombëtar financues mbulon kostot e partnerëve të vet, sipas rregullave të veta kombëtare. Nuk ka fond të përbashkët.

Sipas thirrjes Eureka LinkUp 2025 — në të cilën morën pjesë Shqipëria, Austria, Mali i Zi, Serbia, Sllovenia dhe Turqia — AKKSHI mbuloi 80% të kostove për biznesin e vogël, universitetet dhe institucionet kërkimore; 75% për biznesin e mesëm; dhe 65% për biznesin e madh. Për atë thirrje Shqipëria alokoi 200.000 euro në vit, me kufi 50.000 euro në vit për projekt.

Sipas thirrjes Eureka Network Projects 2024, kohëzgjatja e projekteve ishte deri në 36 muaj.

Normat e mbulimit, kufijtë buxhetorë dhe kohëzgjatja përcaktohen për çdo thirrje dhe ndryshojnë nga njëra në tjetrën.

Si të aplikoni

1. Kontaktoni AKKSHI-n si autoritet kombëtar financues, për të diskutuar idenë e projektit, fizibilitetin financiar, pranueshmërinë dhe procedurat kombëtare.
2. Krijoni një llogari në portalin online të aplikimit të Eureka-s — një llogari për konsorcium — dhe zgjidhni mundësinë e financimit tek e cila doni të aplikoni.
3. Plotësoni formularin e aplikimit për konsorciumin, në anglisht, dhe ftoni partnerët e tjerë të plotësojnë formularin e partnerit.

Pas mbylljes së afatit, aplikimet kalojnë në verifikimin e pranueshmërisë, në vlerësimin kombëtar nga secili autoritet financues, në takimin e konsensusit të autoriteteve dhe në procedurën e etiketimit Eureka, e cila paraprin vendimin për financim. Financimi jepet për projektet që marrin vlerësim pozitiv nga të gjithë autoritetet kombëtare financuese përkatëse.

Gjatë periudhës kur thirrja është e hapur, autoritetet kombëtare dhe Sekretariati i Eureka-s organizojnë webinare informuese. AKKSHI promovon thirrjet nëpërmjet faqes zyrtare, kanaleve të komunikimit dhe ditëve informuese.