COST

Çfarë është

COST është një organizatë financuese për krijimin e rrjeteve kërkimore, të quajtura Aksione COST. Këto rrjete ofrojnë një hapësirë të hapur bashkëpunimi midis shkencëtarëve në të gjithë Europën dhe më gjerë. COST është një kuadër ndërqeveritar i financuar nga BE-ja, i administruar nga COST Association me seli në Bruksel.

Aksionet COST janë rrjete ndërdisiplinore me qasje nga poshtë-lart, të financuara për një periudhë katërvjeçare. Ato bashkojnë kërkues, novatorë dhe profesionistë të tjerë — përfshirë specialistë të industrisë, politikëbërës dhe shoqërinë civile — për të bashkëpunuar mbi një temë kërkimore. Është e mundur të bashkohesh me Aksione në vazhdim, të cilat vijojnë të zgjerohen gjatë periudhës së financimit.

Shqipëria është anëtare me të drejta të plota e COST që nga viti 2018. Ajo është gjithashtu një nga Inclusiveness Target Countries (ITC) — anëtarët më pak intensivë në kërkim, drejt të cilëve COST orienton në mënyrë të posaçme politikën e vet të gjithëpërfshirjes.

Në nëntor 2025, Tirana priti Takimin e 225-të të Zyrtarëve të Lartë të COST (CSO) dhe Ditën Informuese COST.

Objektivat

• Të krijojë rrjete kërkimore të hapura dhe ndërdisiplinore që i japin shtysë përparimeve dhe inovacioneve kërkimore.
• Të zgjerojë pjesëmarrjen në të gjithë Europën, me vëmendje të posaçme ndaj kërkuesve nga vendet me intensitet më të ulët kërkimi.
• Të shërbejë si urë drejt instrumenteve të tjera të financimit: rrjeti i kontakteve i krijuar në një Aksion ndihmon ekipet të formojnë konsorciume për Horizon Europe dhe programe të tjera të BE-së.

Kush mund të aplikojë

Kërkues shkencorë, novatorë dhe profesionistë nga universitetet, institutet kërkimore, industria dhe institucionet publike në Republikën e Shqipërisë, në çdo fushë të shkencës dhe teknologjisë.

Çdo person mund të jetë i përfshirë në maksimumi tre Aksione aktive. Aplikimet nga kërkues që kanë tashmë tre Aksione aktive refuzohen automatikisht.

Çfarë financon

Financimi i COST është i dedikuar ekskluzivisht për aktivitetet e bashkëpunimit — punëtori, konferenca, takime të grupeve të punës, shkolla trajnuese, misione shkencore afatshkurtra, si dhe veprimtari të shpërndarjes e komunikimit. COST nuk financon vetë kërkimin shkencor.

Granti i Inovatorëve COST (COST Innovators Grant) synon të ndërtojë urën nga kërkimi deri te prezantimi në treg i një produkti apo shërbimi. Grantet kanë kohëzgjatje 12-mujore dhe përfitojnë nga të njëjtat aktivitete rrjetëzimi si Aksionet COST.

Si të aplikoni

Si anëtar i Komitetit Menaxhues (MC). Për çdo Aksion lejohen deri në dy përfaqësues për çdo vend anëtar. Për t'u emëruar, dërgoni në adresën cost@nasri.gov.al një CV dhe një letër motivimi, të dyja në anglisht, duke vendosur në titullin e e-mailit kodin e Aksionit (CA______) dhe titullin e tij të saktë. Periudha e vlerësimit mund të shkojë deri në 90 ditë pune. Nëse aplikimi është i suksesshëm, njoftimi vjen me e-mail automatik nga sistemi, me hapat për regjistrimin e profilit në platformën COST. Kur Aksioni ka nisur tashmë, emërimi qëndron “pending” deri në mbledhjen e ardhshme të Komitetit Menaxhues, e cila mund të zgjasë deri në katër javë kalendarike.

Si anëtar i Grupit të Punës. Kontaktoni Kryesuesin e Aksionit ose anëtarët e Komitetit Menaxhues nga Shqipëria për të diskutuar kontributin tuaj. Aplikimi mund të bëhet edhe drejtpërdrejt nëpërmjet faqes së Aksionit në cost.eu.

Në aktivitetet e një Aksioni. Aksionet ofrojnë mundësi pjesëmarrjeje përmes shkollave trajnuese, misioneve shkencore afatshkurtra, seminareve dhe konferencave. Këto promovohen në faqet e tyre të internetit dhe në kanalet e mediave sociale.

Për të propozuar një Aksion të ri. Propozimi bëhet përmes Thirrjes së Hapur COST, e cila ka një proces aplikimi njëhapësh dhe është e hapur për çdo fushë të shkencës.