Në kuadër të programit COST (European Cooperation in Science and Technology), është hapur thirrja “COST Open Call 2026”, e cila synon të mbështesë krijimin e rrjeteve të reja ndërkombëtare të bashkëpunimit në fushën e shkencës dhe teknologjisë.
Thirrja u drejtohet studiuesve, kërkuesve shkencorë, inovatorëve dhe ekspertëve nga fusha të ndryshme, të cilët dëshirojnë të zhvillojnë ide të reja kërkimore dhe të krijojnë rrjete bashkëpunimi ndërdisiplinore në nivel evropian.
Përmes kësaj thirrjeje, COST synon të promovojë përsosmërinë shkencore, shkëmbimin e njohurive, bashkëpunimin ndërkombëtar dhe përfshirjen e studiuesve të rinj në zhvillimin e kërkimit shkencor. Në kuadër të thirrjes së vitit 2026, parashikohet miratimi i deri në 80 Aksioneve të reja COST, me kohëzgjatje katërvjeçare.
Thirrja është e hapur për të gjitha fushat e shkencës dhe teknologjisë, duke inkurajuar veçanërisht propozimet ndërdisiplinore që adresojnë sfida shkencore, teknologjike dhe shoqërore në Evropë.
Mbështetja
Programi COST mbështet krijimin dhe zhvillimin e rrjeteve ndërkombëtare të bashkëpunimit shkencor, duke financuar aktivitete që lehtësojnë shkëmbimin e njohurive dhe bashkëpunimin ndërmjet studiuesve dhe inovatorëve.
Mbështetja mund të përfshijë:
- Organizimin e takimeve dhe konferencave shkencore ndërkombëtare;
- Shkëmbimet afatshkurtra shkencore (Short-Term Scientific Missions – STSM);
- Shkollat e trajnimit dhe aktivitetet për zhvillimin e kapaciteteve;
- Aktivitetet e komunikimit, shpërndarjes së njohurive dhe rrjetëzimit;
- Aktivitete të tjera bashkëpunimi në përputhje me objektivat e Aksionit COST.
Është e rëndësishme të theksohet se COST financon aktivitetet e rrjetëzimit dhe bashkëpunimit, por nuk financon drejtpërdrejt zhvillimin e kërkimit shkencor.
Afati i aplikimit
Thirrja COST Open Call 2026 është e hapur për dorëzimin e propozimeve nga data 31 Korrik 2026, ora 12:00, deri më 28 Tetor 2026, ora 12:00.
Propozimet duhet të dorëzohen elektronikisht përmes platformës zyrtare e-COST.
https://e-services.cost.eu/user/login
Kriteret e pranueshmërisë
Propozimi për një Aksion të ri COST duhet të përmbushë kriteret kryesore të mëposhtme:
- Të përfshijë një rrjet propozuesish nga të paktën shtatë vende anëtare të plota ose bashkëpunuese të COST;
- Të sigurojë që të paktën 50% e propozuesve të vijnë nga vendet e përcaktuara nga COST si vende të synuara për përfshirje (Inclusiveness Target Countries);
- Të përfshijë të paktën 40% studiues dhe inovatorë të rinj (Young Researchers and Innovators);
- Të trajtojë një sfidë të qartë shkencore, teknologjike ose shoqërore;
- Të demonstrojë vlerë të shtuar përmes bashkëpunimit ndërkombëtar dhe qasjes ndërdisiplinore;
- Të përmbushë kërkesat dhe udhëzimet e përcaktuara në dokumentacionin zyrtar të thirrjes.
Në këtë thirrje, një individ mund të marrë pjesë vetëm në një propozim, si propozues kryesor (Main Proposer) ose si propozues dytësor (Secondary Proposer).
Dokumentacioni i aplikimit
Dosja e propozimit duhet të përgatitet sipas udhëzimeve zyrtare të COST dhe të përfshijë informacionin e kërkuar në platformën e aplikimit, përfshirë:
- Përshkrimin e idesë dhe objektivave të Aksionit COST;
- Përshkrimin e rëndësisë dhe risisë shkencore të propozimit;
- Planin e aktiviteteve dhe mënyrën e zbatimit të Aksionit;
- Informacionin mbi rrjetin ndërkombëtar të propozuesve dhe institucionet pjesëmarrëse;
- Përshkrimin e ndikimit të pritshëm shkencor, teknologjik dhe shoqëror;
- Informacionin mbi përfshirjen e studiuesve dhe inovatorëve të rinj;
- Të dhënat dhe dokumentacionin tjetër të kërkuar në formularin elektronik.
Aplikantët duhet të konsultojnë udhëzuesin zyrtar të thirrjes për të verifikuar të gjitha kërkesat teknike, kriteret e pranueshmërisë dhe kufizimet e formatit të propozimit në linkun më poshtë:
https://www.cost.eu/funding/documents-guidelines/
Procesi i aplikimit
Studiuesit dhe ekspertët shqiptarë të interesuar për të propozuar një Aksion të ri COST duhet të krijojnë ose të përdorin llogarinë e tyre në platformën e-COST, të përgatisin propozimin në bashkëpunim me rrjetin ndërkombëtar të propozuesve dhe ta dorëzojnë atë brenda afatit të përcaktuar.
Propozimet i nënshtrohen një procesi vlerësimi konkurrues, i cili përfshin kontrollin e pranueshmërisë, vlerësimin nga ekspertë të pavarur, kontrollin e cilësisë, përzgjedhjen shkencore dhe miratimin përfundimtar sipas procedurave të COST.
Kontakt dhe informacione të mëtejshme
Platforma e aplikimit: e-COST https://e-services.cost.eu/user/login
Faqja zyrtare e thirrjes: https://www.cost.eu/funding/open-call-a-simple-one-step-application-process/
Dokumentacioni dhe udhëzimet: https://www.cost.eu/funding/how-to-get-funding/documents-guidelines/